புலம்பெயர் முஸ்லிம்களின் பலம் வாய்ந்த அமைப்பு உதயம்

இலங்கை முஸ்லிம்களின் பிரச்சினைகளை சர்வதேச மயப்படுத்துவதை நோக்காகக் கொண்டு சர்வதேச மட்டத்தில் பலம் வாய்ந்த அமைப்பொன்றை நிறுவுவதற்கான முயற்சிகள் எடுக்கப்பட்டு வருகின்றன. இதற்காக உலகின் நாலா பாகங்களிலும் புலம்பெயர்ந்து வாழ்கின்ற முஸ்லிம்கள் ஒன்றிணைந்து செயற்பட முன்வர வேண்டும் என்று அழைப்பு விடுக்கப்படுகிறது.

OVERSEAS CEYLON MUSLIM COMMUNITY என்ற பெயரில் இயங்க உத்தேசிக்கப்பட்டுள்ள இவ் அமைப்பின் தற்காலிக பேச்சாளரான கௌஸ் முஹமத் கருத்து தெரிவிக்கையில், “இலங்கை முஸ்லிம்களின் பிரச்சினைகளை சர்வதேச மயப்படுத்தலின் அவசியம் இன்று எம் மத்தியில் எழுந்துள்ளது. இதனை முன்னெடுக்கும் முகமாக சர்வதேச ரீதியாக பலம் வாய்ந்த அமைப்பினாலேயே இதனை மேற்கொள்ள முடியும் என பலராலும் இன்று உணர்த்தப்பட்டுள்ளது.

அகில இலங்கை ஜம்மியத்துல் உலமா இவ்வளவு காலமும் நடத்திய போராட்டம் கேள்விக்குறியாக்கப்பட்டுள்ள ஒரு சந்தேகம் எம் எல்லோர் மத்தியிலும் எழுகின்றது.  அதேவேளை, முஸ்லிம் தலைவர்கள் என்று சொல்லிக் கொண்டு திரிபவர்களால் இன்று முஸ்லிம் சமூகம் பாதுகாக்கப்படவும் இல்லை.

இவ்வாறான மத ரீதியான பிரச்சினைகளின் போது சமூகங்களுக்கிடையே ஒருமைப்பாட்டினைத் தோற்றுவிக்கும் வகையில் பரந்துபட்ட விரிவான தலைமைத்துவமொன்று எம்மிடையே காணப்படவில்லை. இவ்வாறான மிகச் சிறந்த தலைமைத்துவமொன்று இருந்தால் தற்போதைய பிரச்சினைகளுக்கு மிக இலகுவில் தீர்வுகள் வழங்கப்பட்டிருக்கும்.

சர்வதேச ரீதியில் பலம் வாய்ந்த அமைப்பினை உருவாக்கி அதன் மூலம் இலங்கை வாழ் முஸ்லிம்களின் பாதுகாப்பு, அவர்களின் அன்றாட நடவடிக்கைகள் தொடர்பிலான அடிப்படை உரிமைகளைப் பாதுகாத்தல், அவர்களின் வாழ்வுரிமையினை உறுதிப்படுத்தல், இனத்துவ அடையாளத்தினை உரிமையோடு பேணுதல் போன்ற அடிப்படை எண்ணக் கருக்களை கொண்டு சர்வதேச ரீதியில் செயற்படுவதற்கான ஆரம்ப கட்ட ஏற்பாடுகளை ஜெனீவாவை தலைமையகமாகக் கொண்டு இயங்க உத்தேசிக்கப்பட்டுள்ளது என்பதை அறியத் தருவதோடு இக்கட்டான கால சூழ்நிலையில் புலம்பெயர்ந்து வாழும் இலங்கை முஸ்லிம்களிடத்தில் இதற்காக ஒன்றுபடுமாறும் இவ் அழைப்பினை விடுக்கிறோம்.

இதன் முதற்கட்டமாக கடந்த புதன்கிழமை சிறு சந்திப்பொன்று பாரிஸ் வாழ் இலங்கை முஸ்லிம் மக்களிடத்தில் நடாத்தினோம். இதன்போது முழுமையான ஆதரவும் அவசியமும் குறித்து கலந்துரையாடப்பட்டது. இலங்கையைச் சேர்ந்த அதிகமான முஸ்லிம் சகோதரர்களும் கலந்து கொண்டனர். இவ் அமைப்பின் மூலம் இலங்கையைச் சேர்ந்த வெளிநாடுகளில் புலம்பெயர்ந்து வாழும் முஸ்லிம்கள் இதில் ஒன்றிணைந்து செயற்பட முடியும்.

தொழில் புரிவோர், வர்த்தகர்கள் என அனைவரும் இதில் ஒன்றிணைந்து உங்களின் மேலான கருத்துக்களைச் சமர்ப்பிக்கலாம். அத்துடன் எம்மை கீழ் வரும் மின்னஞ்சல் முகவரி ஊடாக தொடர்பு கொண்டு உங்களின் மேலான ஒத்துழைப்பினையும் ஆலோசனைகளையும் வழங்க முடியும் என்றும் குறிப்பிட்டார். தொடர்புகளுக்கு: ocmcge@gmail.com

(அஸ்லம் எம்.மௌலானா)